Begaya Jumat mau ngasi bocorannye dikit aje ye.. biar kaga penasaran sekaligus penasaran. Lah maksudnye pegimane? Ude baca dulu aje.. hehe. Begaya Jumat, 23 Maret 2012, masih barengan Arya Tanjidor (@arya_tanjidor) & Uwie Rogaye (@uwiefitriani), dimandorin ame Mpok Ratih (@Rrrrratih).
Nyarap bubur, buburnye bubur ayam. Nasi goreng, nasi goreng ayam. Mie, judulnye mie ayam. Telor, telor ayam. Emang yang namanye ayam entu paling enak dibuat variasi makanan ye. Kalo dipikir-pikir kesian juga tu ayam. Abis ngelahirin kita ambil telornye. Abis jalan-jalan ame temennye seneng-seneng, kita tangkep buat dijadiin makanan. Tenang dulu Abang None.. itu ude kodratnye si ayam kita olah jadi bahan makanan.. tapi jangan cuman tau makannye doang.. tau kaga fakta-fakta asik yang bakalan kita gelontorin tentang ayam? kudu banget pantengin dah..
Nah, yang eni binatang juga. Tapi jangan ampe dimakan. Bahaya. Baru ngegigit aje efeknye ude bikin heboh se-Indonesia Raya. Abing ditemuin di Surabaya, denger-denger Tomcat ude nyampe Jakarta. Widih.. jangan makin heboh dulu. Mendingan ikutin obrolan Uwie ame Arya tentang si serangga yang mirip kalajengking ame semut eni. Blasteran kayaknye ye si Tomcat eni..Oh iye, selamat menjalankan ritual Nyepi buat temen-temen umat beragama Hindu ye. Kita dengerin aje Abang None, Arya ame Uwie siarannye bakalan bisik-bisik ape tetep gokil kayak biasa? Hehe.. Nyalain radionye mulai jam 6 ampe jam 10 pagi ye, karena Begaya bakalan bikin paginye Abang None jadi makin semangat!
Wassalam!
Fanpage FB : Bens Radio 1062 Jakarta
Twitter : @BensRadio / @BukaPintuBegaya
0 komentar