Ude hari Jumat aje nih Abang None Ncang Ncing Nyak Babe. Sebelon wikenan, pantengin Begaya enak kali ya. Edisi 30 Maret 2012 eni barengan Arya Tanjidor (@arya_tanjidor) & Uwie Rogaye (@uwiefitriani), masih dimandorin ame Mpok Ratih (@Rrrrratih) ame dioperatorin ame centeng studio kita, Bang Arga (@Ari_Garenk). Ade ape aje siiih?
Buat yang punya binatang peliharaan, salah satu kebiasaan bangun pagi yang kaga boleh diliwatin ya ngasih makan si "manis", "belang", atau siapalah nama yang Abnon kasih. Enak juga ada temen nyarap sambil denger Bens Radio ye. Ngomongin binatang, sedeket ape sih Abnon ame mereka? Jangan-jangan yang kita pelihara selama eni termasuk ke dalem Binatang-Binatang Terkuat di Dunia yang bakalan kita ablakin di Fakta Asik Pagi Hari kali eni? Wih.. jangan diliwatin ya. Pantengin..
Bulan Maret ude mau kelar nih Abnon. Ude bikin bulan Maretnye Abnon sebaik mungkin belon? Nah buat nutup bulan eni, Begaya juga pengen kasih yang terbaik, terutama seputaran bulan Maret sebagai Bulan Film Nasional. Kedengerannye asik tuh. Belon telat noh kalo Abnon belon nonton film Indonesia di bioskop bulan eni. Nah, paginye pantengin kita dulu dah. Soalnye selaen topik seru tentang Bulan Film Nasional, kita kedatengan tamu di Buka Pintu jam 9! Woohoo!!
Jadi, sape tamu kita kali eni? Yang ikut ngantri film Ada Apa Dengan Cinta, Mengejar Matahari, Mendadak Dangdut, Pocong 2, ampe Garuda di Dadaku 2, pasti apal ame nama sekaligus mukanye.. Abang nyang atu eni ude banyak ngarahin pemaen-pemaen di film-film hebat entu, sampe bisa dapetin banyak penghargaan. Rudi Soedjarwo bakalan namu besok nih Abnon! Sekalian maen, soalnye doi sembari nganterin anaknye sekolah di deket Bens Radio. Bakal kita apain nih salah satu sutradara terbaik Indonesia eni? Hahaha.. kupingin gimane serunye ngobrol ame Abang nyang atu eni..
Segitu dulu bocoran Begaya Jumat 30 Maret 2012 nye ye Abnon. Pantengin dari jam 6 ampe 10. Banyak lagu enak, info menarik, ame nyang seru-seru dah!
Wassalam!
Fanpage : Bens Radio 1062 Jakarta
Twitter : @BensRadio ame @BukaPintuBegaya
0 komentar