Upacara Perkawinan Adat Betawi - Part 5

Eh Abang None Encang Encing Enyak Babeh, kite ketemu lagi nih ye..

Kemaren kite udeh ngebahas ape aje yang diperhatiin buat tata rias penganten. Dalam sebuah acare pernikahan adat Betawi, ade nyang paling penting dan jadi perhatian tentunye. Ape entu??. 

Eni diye, Sirih Nanas ame Kembang Kelape. Rangkaian kembang melati dan dedaunan sirih, disebut sirih nanas. Sedangkan setiap acare atawe upacare penting yang diselenggarain secara adat dalam masyarakat Betawi selalu ditemuin adanye Kembang Kelape. Ape entu Kembang kelape??. Ape entu Sirih Nanas ??. nyok ah kite bahas lebih rinci..

Sirih Nanas 

Sirih Nanas yaentu salah atu di antara barang bawaan yang kudu ada yang bakal dibawa serta oleh rombongan ngerundet. Sirih Nanas eni digunain ternyata sebagai penghargaan dan persembahan buat penganten putri yang masih gadis/perawan. Rangkaian daun sirih entu ngegambarin lambang keutuhan seorang anak gadis yang terpelihara. Jadi, kalo pengantennya udeh kagak berstatuskan gadis/perawan kagak useh pake sirih nanas. 

Sama ame namanye nanas, udeh pasti deh ye, bentuknye nanas. Tapi cuman bentuk doang ni abang none. Biasanye Sirih Nanas eni dibuat dari buah pepaya mentah yang dibungkus sama lipatan-lipatan daun sirih sekaligus sama daun mahkotanye. Kalu kagak ada pepaya mentah, biasanye diganti ame buah labu siam atawe inti batang pisang sebagai dalam sirih nanas. Ape aje deh bahannye, nyang penting bentuknya sirih nanas. 

Percuma nih abang none, kalu kite cuman bisa liat ade Sirih Nanas di setiap pernikahan, kalu kite kagak tau ape nilai yang terkandung. Eni diye nilai yang terkandung :

Selain ape yang udeh disebutin tadi, makna dedaunan sirih – mau yang jadi pembungkus sirih nanasnye atau yang diletakkin memenuhi wadah/tempat sirih nanas entu ngelambangin banyaknye manfaat daun sirih dalam hidup manusia. Kalu diliat dari penjelasannye entu, dapat diambil kesimpulan deh ye, sirih nanas entu punya Makna Umum, Makna Khusus, ame Makna Lain. 

Makna umumnye, bahwa setiap penganten baru dari kalangan masyarakat Betawi memiliki kewajiban ame tanggung jawab sama tegaknnye Syi’ar Islam, paling kagak buat rumah tangga ame anak keturunannye nanti. Makna khususnye, duri-duri nenas yang merupakan lipatan-lipatan daun sirih pada tubuh nenas entu ngecerminin banyaknye persoalan yang bakal dihadapi di dalam perkawinan. Jalan keluar satu-satunye obat mujarab buat ngatasin ame ngenyelesein seluruh masalah yang ade hanyalah ajaran Agama Islam nyang bisa digali dari Al-Quran dan Hadits. 

Makna Lain, secara nyatanye emang daun sirih eni bermanfaat di kehidupan sehari-hari. Abang None pernah sakit gigi karena belobang, gusi bedarah, luka-luka ringan, atawe gatal-gatal, batuk rejan, ame beberapa jenis keracunan ringan, penyakit mata, mimisan / hidung bedarah atau ape pun, nah sirih eni dia yang cocok buat nyembuhin penyakit entu semua.

Ape aje bahannye??.
    Siapin deh bahan-bahanye, antara lain :

1. Daun sirih dalam jumlah yang cukup banyak.
2. Buah nenas, buah pepaya mentah, buah sayuran labu siam, atawe kalu ade inti pisang juga bisa dipake, yang penting bentuknye buah nenas. 
3. Bunga melati dalam jumlah yang cukup banyak.
4. Buah pinang beberapa buah, baik yang tua / matang atawe pun yang muda dan masih hijau kulitnye.
5. Gambir secukupnye.
6. Kapol secukupnye.
7. Kapur sirih secukupnye.
8. Kertas krep secukupnye.
9. Kertas emas secukupnye, biasanye ade juga nyang make kertas minyak warna merah, kuning, hijau, putih ame warna lainnye. 
10. Cengkeh secukupnye.
11. Kembang setaman 7 rupa yang terdiri dari kemabang mawar merah, melati, cempaka, culan, kenanga, king hong, irisan pandan wangi, semuanye dalam jumlah yang cukup. 
12. Tembakau iris secukupnye.
13. Kuncup kembang cempaka secukupnye.
14. Sirih tampin, sirih yang udeh siap dikunyah. Biasanye direbutin ame anak-anak gadis agar ‘enteng jodoh’ 
15. Lidi secukupnye.'
16. Benang, gunting berikut jarum.
17. Satu kotak kayu berukuran 22 x 22 x 5 cm ( pinggir kotak 3 cm kakinye 2 cm ). Tempo dulu kotak eni terbuat dari emas berukir. Sekarang eni buat kemudahan cukup kotak kayu yang dilapisin kertas emas. 
18. Bentuk laen adalah wadah yang bulat dengan garis tengah 30 cm, tinggi kakinye 10 cm, tinggi tepi        lingkarannye 3 cm.
19. Piso lipet, cutter, atau silet.
20. Lem / perekat.

Gimane Cara Buatnye??

Kalu udeh siap bahannye, tinggal waktunye dibuat deh. Begini caranye :

• Ukir buah pinang muda ( hijau ) dengan menggunakan piso lipet, silet, cutter, dengan ukiran yang suka ade di rumah-rumah Betawi. 
• Kertas minyak atawe krep dari semua warna yang ade digunting. Ukurannye yang cukup untuk ngebungkus buah pinang yang mateng ( kuning ), gambir dan kapul.
• Seudeh entu, buah nenas/ pepaya muda/ labu siam/ inti batang pisang dibersihin. Kalu ngegunain inti batang pisang kudu dibentuk sedemikian rupe ngerupain bentuk buah nenas. 
• Lanjut deh dibuat tusuk kembang melati/ ronce melati yang udeh diberi kuncup kembang cempaka di ujungnye. 
• Badan “ calon “ sirih nanas lamaran yang udeh dibersihin ame dibentuk, ditancepin deh pada sebatang paku gede yang berade pas di tengah kotak / bulatan yang udeh dilapisi kertas emas. 
• Ambil dedaunan sirih yang kecilnye sebanyak 25 buah/lembar, rekatkan ame jarum pentul pada puncuk badan calon sirih nanas lamaran sebagai mahkotanye.
• Daun-daun sirih lainnye dilipat jadi bentuk segi tiga terus direkattin pada tubuh calon sirih nanas lamaran make jarum pentul.
• Abis entu, seluruh dasar wadahnye diberi daun sirih secukupnye.
• Tusuk ronce kembang melati ditempatin sesuai tempatnye maisng-masing. Begitu juga dengan kuncup bunga mawar. 
• Terus, letakkin gambir, pinang, kapur, sirih tampin yang udeh dihias, di atas dedaunan sirih nanas lamaran berikut tembakau iris ame kembang setaman. 
• Biar tambeh kece, bisa juga ditambahin rantai kembang melati mengelilingi pinggir kotak.

KEMBANG KELAPE 

Sekarang giliran kite bahas Kembang Kelape deh ye,

Kembang Kelape biasanye sedikitnye ditemuin 2 rumpun kembang kelape nyang diletakkin pada ujung 2 buah tongkat setinggi 2.5 meter dimane masing-masing dibawa seorang pemuda / pengawal terdepan dari rombongan.  Kembang kelape tersebut berfungsi juga sebagai umbul-umbul. Kalu di acare pesta perkawinan, bakal ditemuin 2 rumpun kembang kelape yang ngapit “ratu” ame “raja” sehari atawe jaga buat ngapit kursi penganten sunat. 

Selaen dipake buat hiasan acare nikahan, kembang kelape dari bentuknye dahulu ampe sekarang, sering dipake buat acara-acara resmi pemerintah DKI Jakarta. Contonye, kayak acare pemilihan Abang None Cilik, Remaja, dan Dewasa.   

Tapi eh tapi Encang EncingEnyak Babeh, fungsi emang boleh cuman buat hiasan doang, sebenernye lebih dari entu maknanye bahwa tumbuhan kelape pada dasarnye kagak ade bagian nyang kebuang. Artinye, seluruh bagain dari tumbuhan kelape entu punya nilai ame manfaat buat kehidupan manusia.  Jadi kalu dikait lebih dalemnye, Warga Betawi kudu bangga ame simbol kembang kelape yang nunjukin kalu orang-orang Betawi, orang yang siap beri hasil guna karyanye berdasarkan daya ame kemampuan masing-masin bagi kepentingan dan kesejahteraan masyarakat. 

KELENGKAPAN & CARA PEMBUATANNYE

     -   Bahan-bahan dan peralatan yang diperlui

• Bahan pokok, terdiri dari :Lidi, kertas minyak atawe kertas krep, lem, batang pisang/ busa plastik kering/ kayu gabus, benang secukupnye.

• Peralatan yang diperluin terdiri dari gunting & pisau lipat, cutter atawe silet.

Catetan :

1. Buat ngapit kursi penganten dibuthin tambahan bahan, minimal dua buah batang pisang & dua buah bokor sebagai tempat bagi batang pisang didirikan. 
2. Bokor yang dipake biasanye terbuat dari bahan perak, emas, tembaga, perunggu, atawe kuningan, bisa juga dari tanah liat bakar yang diberi warna sesuai selera ame kreatifitas pembuat.
3. Untuk umbul-umbul rudat penganten pria / penganten sunat diperlukan dua buah tongkat dengan ukuran mksimum atu setengah kali tinggi orang dewasa.

Begimane Cara Buatnye??.

Kertas minyak atawe kertas krep dipotong selebar 5 cm. Potongan yang diperoleh entu dipotong-potong lagi kiranye ukuran 3 cm dengan meninggalkan bagian yang tidak kepotong lebarnye 2 cm.     

Pada kembang kelape rudat penganten pria/penganten sunat disiapin kuncup-kuncup kembang mawar dari berbagi kertas warna yang ade, terus rekatin sambil diiket pada ujung lidi. Kalu pada Ondel-ondel kuncup kembang mawar eni jarang diparluin.
    

Kertas bewarna yang udeh digunting tadi, direkatin pake lem pada lidi mulai dari pangkal kuncup kembang mawar. Seudeh entu diputer miring terus memenuhi sepanjang lidi entu. Pangkal lidi yang tentunye lebih besar dari ujungnye diruncingin pake pisau atawe cutter. 

Terakhir, pangkal lidi kembang kelape nyang udeh jadi entu, ditusukin deh pada batang pisang atawe busa plastik kering yang udeh disiapin pada tongkat bokornye sampe penuh dengan macem-macem warna nyang ade.
    

Selaen kedua jenis “ kembang kelape penganten “ ame “ kembang kelape Ondel-ondel “ ade juga kembang kelape yang digantung dalem ruangan pesta.

Gimane Abang None, sederhana pan ngebuat Kembang Kelape nye ??
Kegiatan buat kembang kelape eni cocok bener dah kalu lagi Malem Pacar. Dari pade keluar rumah nyang kagak jelas-jelas, mending ngebuat beginian. Same aje asiknye..ihieey..!!
Nah sekian dulu deh Abang None Encang Encing Enyak Babeh bahasan tentang Sirih Nanas ame Kembang Kelapanye.  Besok hari kite lanjut ame bahasan yang lebih cakep lagi.

Jalan-jalan ke kota Palu, besoknye jalan lagi ke Ternate.   
Biar kata Tanjung Priok Banjir Mulu, Tapi Kite tetep Cinte Jakarte.
Nyok..nyok.. nyok..!!