Iskandar Widjaja : Yang Penting Intensitas ame Dedikasi Kita Mainin Musik

Abang None, hari Rabu (8/2) eni Begaya kedatengan bintang tamu nyang kaga biase. Nyang bening, jago maen biola, dan bikin Uwie Rogaye nyut-nyutan saking terpesonanya. Ade Bang Iskandar Widjaja atau nyang akrab dipanggil Bang Izzy. Barengan Mpok Anggie dari Titan Center, abang nyang masih terbiasa ngomong pake bahasa inggris eni nenteng-nenteng case putih nyang ternyata isinye biola kesayangannye.

Bang Izzy ame Mpok Anggie dateng dalam rangka ngasi tau ke Abang None Encang Encing Nyak Babe tentang konser Classically in Love. Konser musik klasik nyambut bulan Februari nyang penuh cinta alias Valentine’s Day. Kebetulan, Bang Izzy eni lagi asik manggung di Jakarta dari bulan Januari kemaren, nah langsung aje diajak ame Mpok Anggie buat bikin konser cinta eni..

Di konser eni, Bang Izzy kaga maen sendiri. Ade pemaen biola Indonesia, Mpok Maylaffayza, nyang bakalan kolaborasi bareng. Bang Izzy yang jago maen musik klasik digabungin ame Mpok Fayza nyang gape banget maenin musik pop, sama-sama pake biola. Classically in Love bakalan digelar hari Sabtu, 11 Februari 2012 eni jam 7-9 malem, di Titan Theater-Titan Center, Jl. Boulevard Bintaro, Blok B7/B1 No. 5, Bintaro Jaya Sector 7.

Balik lagi ke sosok nyang bisa ngehipnotis para fansnye, Bang Izzy nyang sedikit bisa bahasa Indonesia eni kedengeran lucu pas nyapa Abang None.. Kaga tau dapet dari mana tu pesona, Uwie bolak-balik bilang ‘I’m falling in love with you, muah..” Ya ampun Uwie.. inget lakinye di Begaya, Arya Tanjidor..

Nah, berhubung Bang Izzy eni emang fasihnye ngomong pake bahasa bule, jadilah siaran kali eni dua bahasa. Arya Tanjidor nyang bagian nanyain pake bahasa inggris, Uwie nyang bagian berkaca-kaca.. eh.. maksudnye bagian nyang jadi penerjemahnye..  hehe..

Pantes banget kalo Titan Center milih Bang Izzy buat tampil, soalnye emang kegapeannye maen biola ude dimulai dari umur 4 taun. Walaupun ude malang melintang maenin alat musik gesek entu, dia tetep ngerendah lho dengan bilang kaga gampang belajar biola.. Wih, bener tu Abang None, kudu sabar dan disiplin.

Kalo kata Mpok Anggie, Bang Izzy dipilih karena selaen figurnye nyang muda, seneng musik klasik, berbakat, dan sesuai ame visi misi Titan Center, yaentu “Science & Knowledge Sharing”. Berbagi ilmu sama nyang laennya. Nah kali eni, berbagi musik klasik maksudnye.. Karena musik klasik kaga Cuma buat orang berumur aje.. anak muda kudu dikenalin dan suka.. Bang Izzy nambain juga di akhir obrolan, “It doesn’t matter what’s the genre is, the most important thing is intensity of playing the music.”. Kaga peduli genrenya, yang penting intensitas ame dedikasi kita mainin musik entu.

Abang ganteng nyang ngedemenin Idris Sardi buat urusan perbiolaan eni, ternyata lucu banget pas diajak ngegames asik. Dari games entu, ketauan deh favoritnye si Abang.. Lebih milih teh daripada kupi, Christina Aguilera daripada Britney Spears, pake celana dalem daripada pake boxer, film drama daripada action, dan nyang paling bakalan diinget terus ame Uwie Rogaye, Bang Izzy lebih milih Uwie Rogaye daripada Katy Perry! (RP/AK-BR)