Abang None Ncang Ncing Nyak Babeeeeeee, Begaya Senin balik lagi, masih barengan Arya Tanjidor ame Uwie Rogaye, dimandorin ame Mpok Ratih a.k.a Ketua Panitia. Ade ape sih di Begaya edisi 27 Februari 2012 eni?
Yang seru-seru masih bakalan kita gelontorin.. Fakta Asik Pagi Hari contohnye, bakalan ngebahas seputar fakta yang kaga kepikiran ame Abang None tentang jari tangan. Kudu dipantengin entu.. karena selaen nambah pengetahuan, Arya ame Uwie bakalan bahasnye sambil kayak orang bener aje.. hahaha..
Abis maenan jari, kita juga bakalan menuhin kebutuhan informasi Abang None ame headline berita di koran-koran ibukota di Pacaran alias Pagi-Pagi Baca Koran. Berita sekarang eni makin bikin geleng-geleng pala aje. Nah biar kaga ketinggalan informasi, inget, sekali lagi, kudu pan-te-ngin.
Yang kemarenan belon kebagian kita on-airin, tenang aje.. sape tau besok nih giliran Abang None yang kita telpon pagi buta, trus kita kasih “shock theraphy”, hehe.. Ngebangunin Pagi masih ngebuka terus kesempatan buat Abang None yang mau temen atawe keluarga atawe sape aje buat kita telpon on-air.. bisa ngucapin met pagi, met ultah, atawe sekedar iseng aje gitu.. pengen tau reaksinye kalo kita telpon ngasal..
Yang anget.. yang anget.. pagi-pagi yang anget bukan cuman sarapannye Abang None aje.. sarapan buat otak ame pengetahuan umum kita kudu banget diupdate. Topik yang bakalan kita angkat yaentu seputaran perdagangan manusia, atawe kalo mau dibule-bulein istilah kerennya “human trafficking”. Inget dong Abang None ame kasus yang baru kejadian, bayi kembar mau dijual seharga Rp. 40 juta.. ya ampun.. dikira lontong ape dijual-jualin.. ternyata itu cuma atu kasus kecil dari banyaknye manusia yang dijual di Indonesia.. Ih serem amet.. pantengin obrolan kita ame pakarnye supaya Abang None kaga jadi satu dari banyak korban perdagangan manusia ye..
Kita semakin deket ame rangkaian ulang tahun Bens Radio nih.. kaga mau ketinggalan yang spesial kan? Pantengin terus Begaya, ame program-program laennye di 106,2 FM Bens Radio. More Batavian, More Jakarta!
0 komentar