Upacara Perkawinan Adat Betawi - Bag. 1

Menurut sumber sejarah, masyarakat betawi tebentuk dari beberapa golongan penduduk yang pada awal abad ke 19 mendiami daerah yang dulu dikenal sebagai Sunda Kelapa. Sampe pertngahan abad ke 19, mereka udeh kehilangan ciri-ciri aslinye, hingga muncul type masyarakat baru yang kemudian dikenal sebagai kaum Betawi. Kaga heran kalo dalam adat istiadat Betawi banyak terdapat unsur-unsur kebudayaan lain kaya Arab, Cina, Sunda, jawa dan sebagainya yang masuk jadi bagian kebudayaan adat istiadat Betawi. 

Dalam perkembangannye, kebudayaan Betawi kaga cuman di Jakarta, tapi udeh nyebar ke daerah-daerah sekenanye yaentu Bekasi, Depok, bogor ame Tangerang. 

Sebagai kelompok etnik masayarakat betawi juga punye macem-macem atribut sendiri sebagai manifestasi keberadaannye termasuk adat istiadat dalam Perkawinan.Disini kite bakal kupas tentang tata cara dan macem-macem segi dalam perkawinan masyarakat Betawi, baik upacara-upacara yang ngeduluin perkawinan ampe kegiatan akhir penutup peristiwa "penganten baru".

Yang kudu jadi catetan, masyarakat Betawi dipengaruhi banget ame nuansa Islami yang terpancar dalam adat istiadat perkawinannye. Upacara perkawinan bakal kerasa kurang afdol kalo nuansa Betawi entu kaga dimunculin. Nyok kite mulai ngupas upacara perkawinan adat Betawi.

Ngebentuk satu keluarga sebagai suami isteri bukan sesuatu yang digelar ngedadak. Jatuh cinta diawalin dari mata, terus turun ke hati, hati yang bicara maka hati juga yang nentuin. Di kalangan masyarakat Betawi awal kegiatan proses entu disebut ngedelengin.

Dalam Ngedelengin ada dua kemungkinan yang bakal terjadi. Pertame, tindakan aktif pihak orang tua (babe/enyak) nyari dan milih none buat dijadiin calon mantu. Dalam kemungkina pertame eni bisa jadi si orang tua kaga aktif ngedelengin. Kalo udeh kaya gini biasanye tugas ngedelengin dipercayain ame orang lain atawe yang kite kenal ame sebutan mak comblang.

Mak comblang eni yang nyari ame ngumpulin informasi lengkap tentang rupa, kebisaan (kemampuan), prilaku, keadaan keluarga dan hal-hal lain menyangkut si gadis ame keluarganye. Karena entu mak combalang biasanye orang yang punye 'kemampuan khusus'. Tugas mak coblang selesai begitu die berhasil mempertemukan  orang tua si jejaka (abang) ame orang tua si gadis atawe si none. 

Kemungkinan kedua, proses ngedelengin dilakuin sendiri ame si jejaka atawe si abang. Dalam kemungkinan kedua eni, biasanye si jejaka sendiri yang nyari dan nemuin gadis pilihannye. Dia sendiri juga yang ngedeketin, nyari tau  segala informasi tentang orang tua atawe keluarga sang gadis. Kalo si jejaka udeh ngerasa mantap ame gadis pilihannye, maka die bakal ngelapor ke orang tua alias enyak babenye supaya cepet-cepet ngiket si gadis.

Proses ngedelengin dilanjutin ame kegiatan ngelamar, yaentu tindak aktif dari keluarga si jejaka buat minang si gadis jadi calon bini atawe isteri. Kegiatan ngelamar biasanye dilakukan ame keluarga dekat aje. Tapi kaga ketutup kemungkinan ngelamar juga dilakuin sendiri ame orang tua si jejaka.

Waktu ngelamar pihak keluarga si jejaka ngebawa seperangkat barang bawaan berupa pisang raja yang kualitasnye bagus, roti tawar yang gede ame sirih kembang (sirih embun). Barang-barang bawan entu ditempatin dalam wadah terbuka yang dihiasin sebagus mungkin. Tujuannye biar para tetangga kedua belah pihak ngedapetin isyarat adenye kegiatan lamaran.

Utusan keluarga si jejaka bakal diterima ame keluarga sigadis. Setelah barang bawaan diserahin maka bakal ada obrolan antara kedua belah pihak yang biasanye berlangsung dalam keadaan formal ame menggunakan bahasa kiasan. Selanjutnye keluarga jejaka dijamu makan ala kadarnye. Selesai jamuan makan, ade penyajian kopi atawe teh. Saat entu lah dilakukan dialog kedua yang isinye hal-hal yang berkaitan ame permintaan keluarga si gadis.

Yang pertama diputusin biasanye adalah mahar (mas kawin), baru syarat-sayarat lainnye kaya kekudang, pecingkrem, pesalin, uang belanje ame pelangke. Pelangke terjadi kalo si gadis punye kakak laki-laki atawe perempuan yang belum nikah.

Pada waktu mau pulang, utusan sang jejaka bakal minta si gadis tampil. Si gadis bakal nyium tangan para utusan keluarga satu peratu, terus nerima uang sembe (tanda cinta keluarga si jejaka) yang udeh disiapin utusan jejaka sebelumnye.

Seudeh proses ngelamar selesai, utusan bakal balik lagi bawa tanda putus (pertunangan), sekaligus mutusin hari ame tanggal pernikahan ame bawa pecingkrem berupa cincin belah rotan sebagai pengiket. si gadis dikasih juga "uang pesalin" sekedarnye ame kue-kue.

Keluarga si gadis bakal ngebales dengan ngirimin sajian makanan ame lauk-pauknye, antara lain ketan putih, opor ayam, semur bulat, sepasang pesmol bandeng, perkedel bentuk hati, ame beberapa macem kue basah khas Betawi. Barang balesan eni bakal dibagiin kepada utusan ame anggota keluarga sang jejaka.

Walaupun si gadis dan si jejaka udeh ngedapetin restu dari kedua belah pihak dengan adenye tanda putus atawe petunangan, mereka berdua kudu lebih hati-hati dan harus ngejaga kehormatan keluarga masing-masing. Misalnye, kalo mau pergi haru didampingin ame seorang 'pengawal', kaga boleh berduaan. Pengawal biasanye dari keluarga si gadis.

Di bulan Ramadhan si jejaka kudu ngirimin makanan khusus ke pada calon mertua, kaya buah kurma, sirop ame penganan khas Betawi lainnye. dan si gadis bakal ngebales 'antaran' ke rumah orang tua si jejaka berupa kue-kue khas Betawi kaya pacar cina, bikambon, kue bugis dan jenis makanan laen buat buka puasa.

Kegiatan 'antaran' itu dilakuin buat ngebina hubungan yang lebih baik antara kedua belah pihak biar tumbuh nuansa komunikatif antara kedua calon besan.

Umumnye masa tunangan kaga lebih dari setahun. Masa entu bakal berakhir jika pihak orang tua si jejaka udeh ngirimin lagi utusan nemuin calon besan buat memperkuat pembisaraan pade pertemuan sebelumnye. Kalo udeh ade kata sepakat, maka disiapin segala sesuatu menyangkut pelaksanaan akad nikah, mulai dari pendaftaran ke KUA, izin keramaian dan lain-lain menyangkut acara penikahan.

Nah abang none, entu baru persiapan atawe pra akad nikah. Masih ade lagi perawatan khusus calon penganten yang bakal kite kupas minggu depan. Tunggu kelanjutannye ye...! (sumber : Upacara Perkawinan Adat Betawi - Lembaga Kebudayaan Betawi)