 |
| Banner NKOTBSB saat konser di Jakarta |
Suatu hari aye lagi browsing internet buat cari referensi lagu baru. Tiba-tiba aye ketemu ame videoklip sebuah boyband nyang waktu aye masih remaja sempet jadi idola aye. Menariknye, dua boyband entu saat eni bersatu padu, dan jadilah nama baru: NKOTBSB, gabungan dari NKOTB (New Kids on The Block) ame BSB (Backstreet Boys).
Tiba di sebuah video dimane aye melihat dengan jelas NKOTBSB lagi ngadain pertunjukan di sebuah tempat nyang kagak seberape besar, dan penontonnye udeh pasti para mpok-mpok nyang dari postur tubuh ame wajah udeh kagak bise dibilang mude lagi, hahaha. Tapi semua terlihat sangat menikmati, baek si artisnye maupun penontonnye. Glegggg… berase cume bise nelen ludah, sambil berkhayal sedikit, lalu melupakannye begitu aje.
Hari H
Saat hari nyang dinanti udeh dateng, aye kagak sempet lagi berkhayal eni ape entu. Setelah sejenak ganjel perut, aye pun berlari menuju lokasi ruangan konser. Sebuah pengalaman baru buat aye, dimane biasenye nonton konser antri dan masuk biase aje, modal tertib doangan eni mah ade pengaturan nyang lumayan baru buat aye pribadi. Dimane kite kudu berbaris dua-dua, lalu berjalan tertib, hanya buat naek escalator dan lalu masuk ke ruang konser sesuai tiket nyang kite milikin. Semua entu dibikn per kloter. Dalem ati, bagus juga ye buat belajar disiplin secara learning by doing, hehe.
Konser nyang ditunggu banyak abang mpok pun udeh dimulain. Sambil mencoba mengingat lagi lagu nyang sedang dibawain si artis, ingatan aye pun terbang ke jaman dimana aye mulain sering denger lagu mereka di radio. Buseettt lama bener yak, haha. Terutame ketika giliran NKOTB tampil di panggung MEIS (Mata Elang Internasional Stadium), Ancol Jakarte Utare.
Seperti abang none ketahui, NKOTB dan BSB hari Jumat malem, 1 Juni 2012 lalu, ngegelar konser bertajuk NKOTBSB One Night One Stage. Kedatengan mereka kali eni salah satunye digawangin ame Berlian Entertainment. Fiuhh… buat aye dan pastinye buat sebagian abang mpok nyang ade di tempat entu, bukan sekedar One Night One Stage tapi konser mengenang masa remaja, hahaha. Pegimane kagak? Kali pertama aye denger lagu NKOTB entu kira-kira aye udeh atawe baru kelas 6 SD atawe justru awal SMP. Lupa juga sih.. Tapi nyang pasti, band entu udeh ade sejak taon 84. Taon dimane aye masih duduk di sekolah dasar.
Balik lagi ke jaman sekarang. Boyband asal Amerika Serikat, New Kids On The Block (NKOTB) ame Backstreet Boys (BSB), atu-atu, step by stepmalem entu bise dibilang sangat sukses menghipnotis 10 ribuan penggemarnye, mulain dari kalangan masyarakat biase, pekerja media, selebritas ampe turis asing nyang sengaja kemari buat nonton konser. Apelagi buat abang mpok nyang pada saat NKOTB ame BSB masih berjaya, dan masih sangat produktif menghasilkan lagu-lagu hits, kagak sempet nonton konsernye dimari, di Indonesia. Sekedar info atawe juga mengingatkan kembali, NKOTB sempet juga menggelar konser di Indonesia pade taon 1992, sementare BSB tampil di Jakarte pertame kalinye, taon 2008. Lumayan lame juga yee…
Adu Perform Bikin Iri
Tuhan emang Maha Adil hehe. Buat abang mpok nyang ngemilikin tiket Gold, Diamond apalegi VIP pastinye bise dapet tempat duduk. Walopun, ade nyang posisinye sangat deket ame panggung, ade juga nyang justru jauh banget tapi bise liat dengan lumayan jelas. Nyang di bagian Festival, pastinye lumayan capek bediri, tapi urusan bise deket bahkan bise ikutan naek ke panggung, udeh rejeki mereka.
Kelakuan para personil NKOTB ame BSB pun sepertinye saling berlomba memuaskan semua penonton. Maksudnye, semaksimal mungkin kasih penampilan nyang bikin semua penonton puas ikutan nandak, haha, maksudnye puas nyanyi, puas goyang dan puas ngeliat penampilan mereka. Walopun sebagian besar cume bise ngiri alias gigit jari.
Contohnye nih… empat personil BSB nyang terdiri dari Nick Carter, AJ, Howie, ame Brian, mereka sengaja milih empat mpok nyang atu-atu diajak naek ke panggung. Keempat mpok nyang beruntung tadi diminta duduk di kursi lalu dinyanyiin salah satu hits romatis mereka, I'll Never Break Your Heart. Sampe dimari aje, penonton nyang lain cume bise berteriak histeris.. tapi ya udahlah… namenye juga rejeki, hehe. Dan bernyanyilah seantero ruangan konser. Nyang bikin geregetan penonton pastinye, lantaran adegan kagak sampe disitu aje. Ssttt jangan cemas, haha. Kagak ade adegan nyang aneh-aneh, tapi bikin iri doangan. Pegimane kagak, keempat mpok nyang kebetulan emang cantik-cantik entu, diperlakukan sangat romantis ame para personel BSB. Bahkan mpok nyang dipilih Nick Carter nekad ngeluarin hp buat foto bedua di atas panggung. Terang aje nyang lain pade berteriak sewot haha.
Ending dari perform lagu entu, BSB lalu berlutut sambil nyium tangan para mpok tersebut. Istilah mereka tuh, dituntaskan dengan adatnye BSB, haha. Wah wah.. beneran nang laen cuma bise gigit jari.
Lain BSB, lain pula kelakuan personel NKOTB. Mereka ngasi kejutan turun dari atas panggung pas nyanyiin salah satu hits mereka berjudul "Cover Girl". Para penonton nyang sebagian besar para mpok pun langsung secepat kilat merapat buat salaman ame idolanye. Nyang bikin kite cukup terkesan, salah seorang personil NKOTB nyang bername Joey entu bise dibilang cukup fasih saat menyapa penggemar mereka pake bahasa Indonesia. Misalnye nih, waktu bilang "Terima Kasih", atawe, "Aku Cinta Kamu" juga saat para penonton ikutan nyanyi, mereka bilang "Lebih Keras"… Ampe tiga kali kata “lebih keras” entu diucapin. Pengucapannye pun udeh terdengar sangat Indonesia, hahaha, belajar berape lame tuh yee..
Terlena Tembang Kenangan
Kalo abang none ncang ncing nyak babe sempet kenal apelagi ngaku demen ame lagu-lagu NKOTB ame BSB, dan apelagi sempet nongton konser Jumat malem lalu, tentu udeh akrab ame song list berikut eni.. Dari koleksi andalan NKOTB, misalnye mereka antara lain ngebawain lagu-lagu eperti Summertime, Valentine Girl, Please Don't Go Girl, Step By Step, Cover Girl, My Favorite Girl, Tonight, ampe single romatis semacem I’ll Be Loving You. Sementare BSB ngehipnotis abang mpok nyang ade di konser malem entu dengan lagu-lagu seperti berikut: The Call, Get Down, Larger Than Life, Show Me the Meaning of Being Lonely, I'll Never Break Your Heart, Drowning, Shape of My Heart, As Long As You Love Me, All I Have to Give, Quit Playing Games (With My Heart), I Want It That Way, Everybody (Backstreet's Back) ampe nyang agak baru single hits berjudul Incomplete. Hampir semua lagu-lagu entu sempet nangkring berlama-lama di sejumlah chart music, baek radio, tv, ampe majalah musik, puluhan taon nyang lalu, di seluruh dunia, termasuk di Indonesia. Aaahhh beneran kembali ke masa remaja, haha. Bahkan sang idola pun bilang kalo mereka berasa kembali ke taon 1989. Padahal mereka ngerasa udeh melanglang buana, tapi rasanye malem entu seperti balik lagi ke titik nol, dimane mereka baru mengawali kesuksesan mereka. Fiiuuhh, jadi merinding aye, hehe. “Malam ini seperti tahun 1989 aje,” kurang lebih gitu kate Jordan Knight ngewakilin para personil NKOTB lainnye: Joey McIntyre, Donnie Wahlberg, ame Danny Wood.
Stamina Oke
Kalo diliat dari usia ame jam terbang mereka sebagai boyband, pastinye udeh umur yee.. Udeh kagak bise lagi dibilang sebagai “anak cowo alias boy” hahaha. Tapi boy band pastinye tetaplah boyband. Dan sepertinye, hal entu jadi semacam konsekuensi buat para personilnye. Biar kate umur udeh babe-babe, personil NKOTB, Donnie Wahlber misalnye, masih bise nunjukkin ke penonton kalo perut mereka masih sixpack alias rata, dan pastinye masih bise nari, ame tarian khas boyband jaman mereka berjaya, tahun 80-an ampe 2000an awal. Dan pastinye gaya tarian nyang kalo sekarang udeh bise dibilang jadul entu, justru bise ngobatin kerinduan abang mpok penggemar berat kedua boyband entu.
Cinta Indonesia
Sebelon konser kelar, pare personil BSB sempet nyanyiin lagu "Everybody". Salah satu nyang bikin mate kite terharu adalah saat ngeliat salah satu personel BSB ngegunain baju nyang ade tulisan 'Damn I Love Indonesia'. BSBpun sempet pake batik saat kolaborasi ame NKOTB nyanyiin lagu "We Will Rock You".
Soal cinte ame Indonesia, kedua boyband entu pastiney kagak bakalan kemari kalo kagak cinte hehe. Soal makananpun, seperti halnye beberape artis besar luar negeri nyang sempet manggung dimari, mereka juga terkesan ame beberape kuliner Indonesia. Standar sih, contohnye nasi goreng, sate, sop buntut. Tapi kite patut bangga pan kalo mereka juga demen. Ngape kite kita lebih bangga makan fast food? Hahaha..
Kagak terase, konser selame dua jem pun berakhir sudah. Walopun sesekali ade bunyi feedback di bagian sound, atawe suara penyanyi nyang rada kurang sesuai harapan tapi over all konser malem entu jelas bikin para idola NKOTB ame BSB pulang dengan raut wajah puas hehe.***Foto: Mpok Nida & Yunia
0 komentar