Lagi-lagi konser bermaterikan lagu jadul
kembali digelar abang none. Kali eni, buat manjain telinga dan juga mata para
penikmat musik Indonesia era 90 ampe 2000an awal. Buat ente nyang kagak sempet
nonton, eni die cerita ame foto-fotonye..
Abang none nyang kagak demen-demen amat
ame sejumlah karya musisi/penyanyi Ahmad Dhani pastinye bakalan blenger kalo ade di kesempatan entu.
Hahaha, pegimane kagak abang none. Sederetan karya Ahmad Dhani dan juga karya
cipta band Dewa 19 digelar dengan format konser nyang buat ukuran Indonesia sih
lumayan akbar daaahh.. Hal eni jika mengingat karya lagu nyang ditampilin hanya
berasal dari karya Ahmad Dhani ame Dewa 19.
Tapi buat abang none ncang ncing nyak babe
nyang jelas ngaku demen bener ame karya mereka, pasti sangat-sangat menikmati.
Entu belum urusan emosi nyang terkadang begitu aje terkuak begitu kite denger salah
satu intro lagu dimainin. Tiba-tiba atu-atu kenangan nyang ade hubungannye ame
entu lagu-lagu entu terbayang di pelupuk mata. Jiiiaahhh, ga kuaattt….
Hahahaha. Dan secara jujur pun banyak pihak ngaku kalo karya-karya lagu Ahmad
Dhani ame Dewa 19 entu sebagian besar bise dikatakan sangat sing along, jadi
nyang kagak begitu demen misih bise daaah menikmati.
Mengkenye kagak heran abang none, kalo
malem entu Ahmad Dhani sempet bilang, banyak banget lagunye nyang kagak bise
ditampilin, lantaran lagu-lagu enak nyang die ciptain jumlahnye terlalu banyak. Hehe,
ente boleh komentar ape aje abang none, tapi ade benernye juga ucapan entu. Dan
Dhani emang ngebuktiin kepada penikmat musik Tanah Air kalo konsernye nyang
dimulai dari jem 9 malem entu berase kagak kelar-kelar hahaha.. Selame empat jem baru 30 lagu aje nyang
ditampilin dari sekian banyak karya Ahmad Dhani nyang sempet atawe misih jadi
hits. Kenape aye bilang misih jadi hits. Yaa seperti ente ketahui, ade aje lagu
ciptaan Ahmad Dhani dan atau karya Dewa 19 nyang masih di-cover version alias
dinyanyiin ulang ame penyanyi saat eni. Contohnye Cintakan Membawamu Kembali,
lagu nyang jadi salah satu hitsnye Dewa 19 di tahun 1992 entu lumayan sukses
saat dinyanyiin ulang ame Reza Artamevia di taon 2000 dan di taon 2012 eni
kembali dibawain ame grup vocal XO IX. Pastinye mereka juga pengen mengulang
kembali kesuksesan tersebut.
Nostalgia
Baladewa
 |
| Penampilan Mulan Jameela |
Pesona Dewa 19 emang belon kelar abang
none. Sekalipun Dhani udeh sempet atawe misih juga jalan bareng ame beberape
band bentukannye. Mulain dari Dewa 19 kendiri, lalu ade Dewa, Ahmad Band dan
sekarang T.R.I.A.D. Belon sejumlah artis penyanyi nyang tergabung dalam
manajemennye dan pastinye kerapkali ketika rekaman ngebawain lagu-lagu ciptaan
Dhani. So, kalo semua lagu ciptaan Dhani dan juga Dewa 19, roman-romannye butuh
waktu sehari semalem atawe bahkan lebih buat waktu gelarnye.
Nah, konser nyang kali eni digelar, udeh
jelas dipadetin ame sebagian besar nyang adalah para baladewa dan tentunye
sempet nikmatin karya-karya Dewa 19 mulain dari single pertame mereka ampe jadi
album perdana dan bahkan ampe mereka jatoh bangun atawe kondisi terakhir saat
eni.
Rabu malem entu, konser Mahakarya Ahmad
Dhani dan Dewa 19 dimulain ame penampilan Agnes Monica nyang ngebawain ulang
lagu hits ciptaan Ahmad Dhani berjudul Dewi Cinta. Lagu entu sih aslinye
berjudul Pangeran Cinta dan dinyanyiin ame Dewa taon 2004, kala entu band Dewa
bervokaliskan Once Mekel. Versi Agnes Monica eni abang none, sempet juga dinyanyiin
ame grup vocal trio perempuan bentukan Ahmad Dhani, bername Maha Dewi dan
judulnye digubah jadi Dewi Cinta. Lagu eni berasal dari album berjudul same ame
lagunye, dan diproduksi taon 2009. Abing Agnes tampil, disusullah Mulan Jameela
nyang ngebawain salah satu hitsnye di taon 2007, Makhluk Tuhan yang Paling
Seksi.
Beberape kali suasana panggung dimeriahin ame penampilan “penggembira” hehehe, misalnye nih pas rombongan Dewa 19 bakal tampil di panggung. Sebelonnye, penonton dikasi surprise ame rombongan penabuh drum band nyang diantara mereka ade para personil Dewa 19 versi asli tapi udeh beda umur, beda gaya beda suasana haha… Bise dibayangin, abang none ncang ncing nyak babe nyang 90 persen lebih pasti ngefans berat Dewa 19 langsung menyambut mereka ame gemuruh tepuk tangan. Abang Ari Lasso pun langsung ngajak pare penongton kembali bernostalgia ame lagu hits berjudul Restoe Boemi. Apelagi disusul ame sederet lagu nyang pastinye sempet jadi idola buat penikmat lagu-lagu Dewa 19. Contohnye nih, ade lagu berjudul Elang, Cinta Kan Membawamu ame Aku di Sini Untukmu. Mmmmhhh.. mingkin dalem aje tuh suasana nostalgianye hahay…
Dan pastinye lagu-lagu seperti entu tadi
bukan cuma bikin abang none ncang ncing nyak babe nyang nongton konser jadi ade
nyang terharu, merinding, atawe sekedar kangen ame temen SMA. Nyang nyiptain
lagu ame nyang nyanyi pun jadi terharu.
“Lagu-lagu seperti Restoe Boemi cukup membuat saya meneteskan air mata.
Jadi ingat masa lalu," gitu dah kate Dhani, sambil seolah pengen ngingetin
awal karirnye bareng Dewa 19.
Parade
Penyanyi Kondang
 |
| Penampilan Dewa19 |
 |
| Penampilan Lucky Laki |
Sesuai sub judulnye abang none, buat
mulain gelaran eni, Ahmad Dhani milih anak-anaknye nyang ngeband bareng sepupu
mereka buat tampil dan memberi suasana lain. Abang none pasti udeh tau atawe
sempet denger ame band bernama Lucky Laki pan yee.. Nah, band eni sempet dikasi
kesempatan nyanyi beberape lagu ciptaan bapak-om mereka, seperti hits single
mereka “Superman”, termasuk ngebawain salah satu lagu rock internasional nyang
menurut Ahmad Dhani disebut sebagai lagu tradisi keluarga mereka. Lagu nyang Dhani maksud entu adalah sebuah
lagu dari band rock legendaris Led Zeppelin, dengan hits mereka berjudul Black
Dog. Haha ade-ade aje..
Nyang pasti, penampilan mereka lumayan
menghibur pare penongton daaahh.. minimal sedikit menjadi pelipur lara seabing
bernostalgia dan jadi larut ke masa lalu, hahay.. Saking terhiburnye ampe
beberape mpok-mpok nyang berdiri di sekitar aye berulang kali terteriak
histeris.. manggil name-name para entu bocah ganteng nyang lagi tampil saat
entu, haha..
Seabing penampilan dari Lucky Laki lalu
berderet tampil sejumlah penyanyi kondang ibukota baek nyang diorbitin ame
Ahmad Dhani, nyang sempet kerjasama atawe nyang sekedar dinilai Ahmad Dhani
cocok buat ngebawain ulang lagu-lagunye. Sebut aje dari mulain Maha Dewi, Titi
DJ, Judika, Vina Panduwinata, ampe Afgansyah Reza dan beberape kontestan Indonesia
Idol 2012. Mereka entu nyanyiin lagu-lagu hits seperti Dokter Cinta (dinyanyiin
ame Maha Dewi), dan sejumlah lagu lain. Afgan misalnye abang none, selain
nyanyiin hits Dewa di tahon 2000 berjudul Risalah Hati, juga nyanyiin lagu
ciptaan Ahmad Dhani nyang sempet popular ame suara Chrisye berjudul Andai Aku
Bisa, nyang sempet popular di taon 2001. Sementare salah satu diva Indonesia,
Mpok Vina Panduwinata bikin penongton malem entu pade terkesima ame lagu
berjudul "Lagu Cinta" juga "Mistikus Cinta".
Ahmad Dhani kendiri abang none, sempat nyanyi
beberape hits single nyang sempet diusung ame T.R.I.A.D, band bentukannye (dan
misih eksis ampe gini ari). Lagu-lagu nyang die nyanyiin entu misalnye Kamu
Kamulah Surgaku, juga single nyang
lumayan happening Bukan Selir Hati.
Jatah
Idol
 |
| Para Penonton mengabadikan moment |
Beberape peserta Indonesian Idol 2012 bise
dibilang beruntung kali ye, bise ngeramein konser Mahakarya Ahmad Dhani dan
Dewa 19. Pegimane kagak beruntung. Senior mereka nyang udeh-udeh sih umumnye
misih dalam proses penggojlokan, nyang eni udeh kecepretan rejeki manggung aje
hahaha.. Bahkan ade juga nyang duet ame senior mereka. Misalnye nih, Regina nyang
sempet duet ame Judika lewat tembang berjudul Cinta Mati 1.
Ade juga Sean nyang ngebawain salah satu
lagu syahdu dan pernah hits pada jamannye berjudul Keabadian. Lagu ciptaan
Ahmad Dhani nyang dinyanyiin Reza Artamevia entu sempat popular di tahun 2000
dan misih sangat akrab di telinga khususnye pendengar radio beberape taon
setelahnye.
Sementara Dion nyang bise dibilang
spesialis lagu beraliran swing roman-romannye sengaja diminta Ahmad Dhani buat
ngebawain lagu nyang cocok ame karakter Dion. Buktinye lagu Madu Tiga berhasil
bikin nyang nongton entu konser pade joget-joget, hahay…
Dan terakhir, ade Yoda nyang kalo abang
none liat di layar tipi emang udeh ngerock dari sononye entu, hehe, bise
dibilang sukses ngerock paar baladewa ame lagu berjudul Cemburu.
Konser nyang udeh berlangsung di Plenary
Hall JCC Senayan Jakarta hari Rabu lalu eni emang terlihat bise memenuhi hasrat
para baladewa buat menumpahkan rasa kangennye selame eni pada penampilan live
mereka. Diantare abang none ncang ncing nyak babe mingkin aje, ade nyang jadi
salah satu dari sebanyak lima ribu pasang mata nyang malem entu sempet nonton.
Tapi mingkin aje banyak juga nyang kagak sempet nikmatin padahal sih pengen
juga. Tapi lantaran satu dan laen hal cume bise menyimpan rasa inginnye aje.
Kagak ape-ape yee.. jangan sediihh.. Smoga sekelumit cerita eni bise ngobatin
rasa kangen ente. By the way nih.. kapan ente terakhir nongton konser Dewa 19?
Kalo aye sih… taon 1995 hahaha, gubrak, waktu misih jaman kuliah dengan harga
tiket nyang pastinye cume bise buat beli bensin seleter, jajan bakso ame es
teler kalo jaman sekarang, hahaha… So, adakah nyang lebih lame dari pengalaman
aye? Kalo ente jadi mingkinan kangen ame lagu-lagu mereka, ya udaahh jangan
geser-geser gelombang ente, tetep stay tune dimari, di Bens Radio 106.2 FM, www.bensradio.com, nyooookkkkkk (teks &
foto: NIDA)
 |
| Antrian penonton Konser Dewa19 |
0 komentar