 |
| Jabrik Pitoeng, Mpok Ratih, Bang Ari Garenk, Uwie Rogaye |
Begaya Rabu 13 Juni 2012 masih barengan Uwie Rogaye ame Jabrik The Pitoeng, dan dimandorin ame Mpok Ratih a.k.a Ketua Panitia (gara-gara suka pake jaket yang ade tulisannye Panitia. Nasib..nasib). Kagak lupa Ari Garenk sebagai centeng studio alias operatornye. Ade ape aje ye kali eni?
Nyang selalu ade, pastinye rangkuman headline penting pagi eni di Pagi-Pagi Baca Koran alias Pacaran, Nyak Iis alias Nyanyi Iseng-Iseng, dimane kite senandungkan lagi lagu-lagu Babe dimari bareng kru Begaya, dan yang pasti ade Pos Dongkol di segmen terakhir buat yang lagi dongkol gara-gara ape aje. Mr. Jabrik yang dibantu ame Emon bakalan ketemuan ame Mpok Mirah yang doyan dongkol, tapi rempong! Hahaha..
Fakta Asik edisi kali eni masih ade angka 5 nye. Maklum, angka bagus buat Bens Radio - Etnikom Network. Pagi-pagi paling enak mandi. Mau pake aer dingin, aer anget, aer panas, asal bukan aer mendidih aje.. Jangan salah, selaen aer-aer yang barusan kite sebutin, ternyata ade cara-cara unik mandi, yang bikin kite geleng-geleng kepala. Ape aje tuh? Pantengin mangkenye..
Topik anget di jam ke-2 bakalan ngangkat tentang eksistensi kantor pos, kartu pos, surat pos, ame segale macem printilan pos-posan yang ude kegeser ame fenomena media sosial macem Facebook ame Twitter. Segala kemudahan ame akses cepet yang ditawarin, bikin kite lupa kalo dulu kite pernah bergantung ame kantor pos buat sekedar ngirim gombalan buat gebetan di ujung sono liwat surat cinta.. Sekarang?
Pikir dua kali kalo mau ngelupain jasa pos di jaman sekarang, karena mereka masih ade.. pecinta filateli juga kaga ilang. Tapi jangan pikir-pikir buat dengerin Begaya, jam 6 ampe 10 pagi.. gak rugi buat nyemangatin hari Rabu nye Abang None! Nyok!
(RPS)
0 komentar