Begaya Rabu mau ngebocorin ape aje yang bakal kita ablakin nih.. catet ye waktunye, jam 6 ampe jam 10 pagi, ame Arya Tanjidor (@arya_tanjidor) & Uwie Rogaye (@uwiefitriani). Kaga pake lama dan kaga bertele-tele. Di edisi 28 Maret 2012 eni, bakalan ada :
- Fakta unik tentang jeruk yang belon pernah Abang None denger sebelonnye.. wih, kayak ape tuh ye jeruk? pantengin, jangan cuman bisa makannye doang ye..
- Ngebangunin Pagi. Sape ye kira-kira Abang None yang bakal kita on air-in besok buat kita kerjain, siarin suara bantalnye atawe kebiasaan paginye Abang None? Jangan-jangan Abang None lagi!
- Nah eni die, yang kemarenan demo gila-gilaan, dimane-mane, gak di Jakarta gak di Makassar yang katenye sampe ricuh banget. Kalo ude selesai demo, boro-boro didengerin ame yang didemoin, eni malah ninggalin kerusakan dimane-mane. Fasilitas umum jadi korbannye. Rusak. Gak bisa dipake lagi. Dan emang diluar salah satu dampak negatif demo anarkis, rusaknye fasilitas umum entu ya akibat sengaja dirusak ame beberapa oknum yang iseng. Kaga sadar aje, tiap Abang None pergi ke tempat aktivitas, pasti ngelewatin fasilitas umum yang akhirnya ditelantarin karena ude rusak. Jaga bareng dong.. hadeuh.. kita ajak ngobrol aje deh wakil dari orang yang harusnye paham kalo kita eni kaga boleh ngerusak fasilitas umum yang notabene DIPAKE BARENG-BARENG.
Ude ah segitu dulu.. masa mau dibocorin semuanye, ntar gak seru lagi.. Nyok ngerapet! Bisa rikues lagu enak lagi, ah ude paling kumplit paginye Abang None kalo dengerin Begaya!
Wasssalamlekom!
0 komentar