Trotoar Hak Pejalan Kaki

“Udah jadi borok juge berakar bakal diobatin…ape mampu tuh bang…?... entu kata bang ajis warga Gang Sentiong Jakarte Pusat kepade Bens radio, terkait ame rencana penataan trotoar ame Pemprop juga Kepolisian yang udeh beralih fungsi jadi jalan pintas sepeda motor ame pedagang kaki lima dari mulain tukang dagang pulsa, dagang kaca ampe dagang makanan ame minuman siang juga malem ampe dini hari. Mampukah pengembalian trotoar sebagai fungsi hak pejalan kaki yang nyaman bisa diselesein ame Pemprop DKI sampe jajaran Kepolisian juge dinas terkait ? Mpok Yanni warga Tebet juga bilang : “Sebuah PR yang kagak hanya dijawab ame kata-kata aje, tapi kudu pake Perda juga aturan sampe sangsi yg teges, kalo ojek sampe motor naik trotoar nih bang, gue paling gedeg, apelagi kalo dagang nutupin trotoar …capek deh”.

Kemaren, Kepala Subdit Keamanan dan Keselamatan Ditlantas Polda Metro Jaya Ajun Komisaris Besar Yakub Dedy Karyawan, di kantornye kepade pare wartawan bilang  trotoar direncanain bakal dipasang pembatas berupa tiang sepinggang ame jarak 1 meter antare satu same nyang laen. Dan Diharepin kagak ade PKL lagi, dan pejalan kaki bisa lebih nyaman. 

Malahan sebelonnye, Direktorat Lalu Lintas Polda Metro Jaya mengundang 500 tukang ojek di Jakarta buat ngikut penyuluhan tentang pentingnya fungsi trotoar dan keselamatan berlalu lintas di jalan raya. Sementare Kasubdit Dikyasa Ditlantas, Ajun Komisaris Kanton Pinem, kepade Bens radio bilang, trotoar di Jakarta udeh banyak berubah pungsi, seperti di kawasan Cawang, Benhil ame Semanggi. Dirinye bakal ngasih prioritas dulu ke tukang ojek yang mangkal di jalur protokol, seudeh entu baru pihaknye bakal ngasih sosialisasi ke nyang lain.

Bang Kanton Pinem nambahin, Kudu ade kesadaran dari pare tukang ojek, pedagang kaki lima ame kerjasame dari para pemangku kepentingan terkait, seperti Dinas Pertamanan, Dinas Perhubungan, Bina Marga juge Satpol PP buat ngembaliin Fungsi Trotoar di Jakarta kudu benar-benar bakal orang jalan kaki. (AA-BR)