Upacara Perkawinan Adat Betawi - Bag. 2

Abang none, di bagian 1 kemaren udeh kita bahas tentang Pra Akad Nikah, dari mulain ngedelengin, ngelamar, ampe tunangan. Nah, di bagian 2 eni kite bakalan ngupas soal perawatan khusus salon penganten. Nyok kite mulain.

Perawatan khusus calon penganten bakal difokusin buat calon penganten perempuan. Alesannye, biasanye yang jadi pusat perhatian adalah penganten perempuan. Selain entu orang beranggapan kalo calon penganten laki-laki biasanye udeh bisa ngerawat dirinya sendiri, jadi kaga perlu didukung ame perawatan intensif.

Perawatan buat calon penganten perempuan eni maksudnye supaya kondisi penganten tetep prima, cantik, cerah ame menarik, baik waktu akad nikah atawe waktu pesta pernikahan.

Untuk perawatan eni biasanya ada orang khusus yang piawai dibidangnye yang ame masayarakat Betawi dikenal dengan name 'Tukang Piare'. Die eni yang bertanggungjawab sepenuhnye buat ngatur dan nentuin jangka waktu perawatan, obat-obat tradisional yang mesti digunain dan ape aje yang mesti jadi makanan tetep ame makanan yang 'dilarang' buat calon penganten perempuan.

Kegiatan eni dilakukan ame 'Tukang Piare' antara 3 minggu ampe 1 bulan sebelum pernikahan. Pengantin perempuan kudu makan makanan yang dibakar aje, kaga boleh nyentuh makanan yang digoreng. Minuman wajibnye 'air secang' ame jamu-jamuan yang digodok. 

Selama dipiare, calon penganten perempuan make kebaya yang lengannye longgar biar gampang waktu ngambil wudlu. Seluruh badannye dilulur ame ramuan lulur penganten. Setiap selesai ngelaksanain sholat, lulur pada wajah, lengan ame kaki nye dibaruin lagi. Pada masa dipiare, calon penganten perempuan kaga boleh mandi sampe waktu yang ditentuin.

Setelah sebulan dipiare, calon penganten perempuan dimandiin ebelum akad nikah dan diterusin ame malam pacar. Pengenten perempuan keluar dari kamar pake kebaya lengan longgar (lengan goeng), kaen sarung batik ame kerudung dan rambutnye digelung. Seudeh acara mandiin penganten semua busana yang dipake entu dihadiahin ame 'tukang piare'.

Acara mandiin penganten biasanye diduluin ame pembacaan doa buat keselamatan ame keberkahan penganten. Selesai baca doa, penganten nyium tangan kedua orang tuanye. Dengan iringan bacaan sholawat nabi, dipandu ame 'tukang piare', calon penganten perempuan menuju tempat pemandian yang udeh disiapin.

Peralatan yang digunain buat mandiin penganten yaentu :

Urutan orang-orang yang terlibat mandiin penganten perempuan yaentu :

Seudeh dimandiin, calon penganten perempuan terus 'ditangas', yaentu mandi uap ame ramuan tradisional buat ngebersihin sisa-sisa luluran yang masih nempel di pori-pori seluruh badan calon penganten. Tujuan laen dari kegiatan eni supaya calon penganten kaga terlalu banyak ngeluarin keringat dan supaya badannye ngeluarin bau ame aroma yang harum.

Peralatan yang diperluin :

Dikerik, yaentu ngilangin bulu-bulu halus yang numbuh disekitar tengkuk, pinggiran pipi kiri dan kanan juga dahi. Sedangkan potong centung yaentu motong ame ngerapihin rambut cambang. Eni maksudnye buat lebih mempercantik penganten saat duduk di pelaminan.

Dalam pelaksanaan 'ngerik' diperlukan sesajian berupa :

Sesajian eni dihadiahin ame 'tukang piare' yang bakal ngundurin diri, selanjutnye tugas diserahin ame 'tukang rias'. Adapun peralatan yang diperlukan dalam acara 'ngerik' ame 'potong centung' yaentu :

Pengalihan tugas dari 'tukang piare' ke 'tukang rias' dilakuin dengan cara, tukang rias minta ame tukang piare ngerelain penganten yang selama eni dirawatnye. Mulain saat entu penganten jadi tanggung jawab tukang rias. Pada saat tukang rias nyerahin sesaji ame tukang piare, tukang piare nyatain ngundurin diri dan nyerahin tugas selanjutnye ame tukang rias.

Dua uang logam digunain buat penjepit rambut cambang yng bakal dirapihin mulain dari pelipis penganten perempuan. Seudeh rapi dan ditemuin panjangnye sebatas uang logam entu di depan telinga penganten perempuan, terus dipotong. Guntingan/potongan centung bakal ngebentuk kaya kuncup bunga cempaka, diatas membesar dibagian ujung/bawahnya lancip dan kecil.

Seudeh proses tadi selesai, calon penganten perempuan dipindahin ke ruang tengah rumah. Disini udah nunggu temen-temennye sesama gadis dan ibu-ibu muda lain yang bakal ngikutin acara 'Pakai Pacar'. Calon peganten duduk diatas permadani yang dialasin kaen putih. Kuku-kuku di kedua belah jari tangannye di beri ramuan tradisional, yaentu daun pacar yang udeh ditumbuk halus. Pemakaian pacar eni diawali ame tukang rias, disusul berturut-turut ame ibu kandung calon penganten, keluarga, kerabat/sodara ame temen-temen deket.

Sebagai catetan : pelaksanaan acara 'ngerik' dan acara 'potong centung' biasanya dilakukan antara waktu sholat Ashar ampe menjelang sholat Maghrib. Sedangkan acara 'pakai pacar' dikakukan seudeh waktu sholat Isya. Karena entu disebut 'Malam pacar' 

Abang none, Upacara Perkawinan Betawi masih bakal kite lanjutin. Tungguin kalenjutannye minggu depan ye...!


(sumber : Upacara Perkawinan Adat Betawi - Lembaga Kebudayaan Betawi)